Brukarmedverknad

For at digitale løysingar skal bli vellukka og brukt av dei som er avhengige av tenestene, er det viktig at brukarane deltek i utviklingsarbeidet.

Med frå starten

Det er brukarane av ei teneste som best kan seie om ei teneste er brukarvennleg, eller ikkje. Pasientreiser HF legg vekt på å ha deltakande brukarar frå planlegging av ei ny teneste, til den er sett i drift.

Brukarutvalet til Pasientreiser HF involverast jamnleg i drifta og utviklinga av tenestene. Brukarutvalet er eit rådgjevande organ for leiinga i Pasientreiser HF, og gjennom mellom anna dialog, drøfting og testing, er medlemane særs viktige samarbeidspartnarar for føretaket.

Testing av tenestene blir i tillegg gjennomført i andre kanalar, og med andre brukarrepresentantar. Utviklinga av digitale tenester i samband med pasientreiser, blir gjort i tett samarbeid med Direktoratet for e-helse, Norsk Helsenett og andre tenesteleverandørar, og gjort tilgjengeleg for brukarar på den nasjonale helseportalen helsenorge.no.

Viktige tilbakemeldingar

Brukarmedverknad er avgjerande for å lukkast med utviklinga av digitale brukartenester innan pasientreiseområdet. Pasientreiser HF skal jobbe målretta for å systematisere tilbakemeldingar fra brukarane, slik at tenestene er brukarvennlege og at myndigheitene når målet sitt om at digital kommunikasjon skal vere hovudregelen for kommunikasjon med forvaltinga.

Pasientreiser HF har faste brukarrepresentantar i to ulike samarbeidsarenaer, det er Samarbeidsforum og fagforum for innbyggjartenester.